Xalqaro "Chiqindisiz dunyo uchun" kuni doirasida Yunusobod tumanidagi Botanika bog‘ida aholining ekologik madaniyatini oshirish va atrof-muhitni muhofaza qilish masalalariga e’tiborni jalb etishga qaratilgan ekologik-ma’rifiy aksiya tashkil etildi. Tadbirda 60 dan ortiq kishi faol ishtirok etib, hududni obodonlashtirish va sanitar tozalash ishlariga o‘z hissasini qo‘shdi. Aksiya davomida maishiy chiqindilarni yig‘ish va olib chiqish, yashil hududlarni tozalash hamda hududni sanitariya holatiga keltirish ishlari amalga oshirildi. Tadbir yakunida Botanika bog‘i hududidan 10 tonnaga yaqin maishiy chiqindilar yig‘ib olib chiqildi. Bunday ekologik tashabbuslar atrof-muhitga mas’uliyatli munosabatni shakllantirish, tabiiy boyliklarni asrab-avaylash va jamoat joylarida tozalikni saqlashga xizmat qiladi.