So‘nggi yillarda o‘zbek tilini rivojlantirish va uning davlat tili sifatidagi nufuzini mustahkamlash bo‘yicha tizimli chora-tadbirlar amalga oshirilmoqda. O‘zbek tili mamlakatimiz ijtimoiy hayotining barcha jabhalarida faol qo‘llanilmoqda va uning xalqaro maydondagi nufuzi tobora ortib bormoqda. Xorijiy mamlakatlarda o‘zbek tiliga alohida e’tibor qaratilib, uni o‘rganishga qiziqish ortib bormoqda. Bunday sharoitda lotin yozuviga asoslangan o‘zbek alifbosi va imlo qoidalarini tegishli soha mutaxassislari tomonidan olib borilayotgan ilmiy-tadqiqot ishlari asosida takomillashtirish zarurati yuzaga kelmoqda.
Ushbu Qonun bilan "Lotin yozuviga asoslangan o‘zbek alifbosini joriy etish to‘g‘risida"gi O‘zbekiston Respublikasi Qonuniga lotin yozuviga asoslangan o‘zbek alifbosi 26 ta harf va 3 ta harf birikmasi o‘rniga 28 ta harf va bitta belgidan (apostrofdan) iborat bo‘lishini nazarda tutuvchi o‘zgartirishlar kiritilmoqda. Mazkur Qonun lotin yozuviga asoslangan o‘zbek alifbosi va imlo qoidalarini yanada takomillashtirishga, shuningdek, davlat tilidan foydalanish va uni raqamlashtirish imkoniyatlarini kengaytirishga xizmat qiladi.
Qonunning to‘liq matni bilan rasmiy veb-saytda tanishish mumkin: www.lex.uz
