So‘nggi yillarda mamlakatimizda vijdon erkinligini ta’minlash, muqaddas islom dinining insonparvarlik mohiyatini o‘zida mujassam etgan qadriyat va an’analarni asrab-avaylash hamda kelajak avlodlarga yetkazish, yurtimizda hukm surayotgan tinchlik-osoyishtalik, millatlararo totuvlik va diniy bag‘rikenglik muhitini mustahkamlash, shuningdek, kam ta’minlangan, ehtiyojmand fuqarolar va nogironligi bo‘lgan shaxslarni har tomonlama qo‘llab-quvvatlash borasida keng ko‘lamli ishlar amalga oshirilmoqda. Bunday xayrli ishlar, ayniqsa, muborak Ramazon oyida yaqqol namoyon bo‘ladi.
Xalqimiz uchun azal-azaldan mehr-oqibat, saxovat va bag‘rikenglik ramzi bo‘lgan Ramazon oyini munosib kutib olish va yuqori saviyada o‘tkazish maqsadida: O‘zbekiston musulmonlari idorasining 2025-yil muborak Ramazon oyining boshlanishi 1-mart kuniga to‘g‘ri kelishi to‘g‘risidagi axboroti ma’lumot uchun qabul qilinsin. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari Din ishlari bo‘yicha qo‘mita, Ijtimoiy himoya milliy agentligi, O‘zbekiston mahallalari uyushmasi, O‘zbekiston faxriylarining ijtimoiy faoliyatini qo‘llab-quvvatlash "Nuroniy" jamg‘armasi va boshqa hamkor tashkilotlar bilan birgalikda hududlarda Ramazon oyini milliy an’ana va qadriyatlarga mos ravishda o‘tkazish chora-tadbirlarini amalga oshirsin.
Ushbu muborak oyda "Ramazon - saxovat, birdamlik va bag‘rikenglik oyi" g‘oyasi asosida quyidagilarga alohida e’tibor qaratilsin: ehtiyojmand insonlar va ilm-ma’rifatga chanqoq yoshlarga yordam ko‘rsatish tashabbuslarini qo‘llab-quvvatlash; oila rishtalarini mustahkamlash, mahallalarda o‘zaro tushunish va ishonch muhitini kuchaytirish, shuningdek, hurmat, mehr-oqibat va insoniylik kabi qadriyatlarni ulug‘lash; atrof-muhitni muhofaza qilish, muqaddas ziyoratgoh va qadamjolarni, qabristonlarni obodonlashtirish, ko‘chat ekish, shuningdek, Ramazon oyi bilan bog‘liq tadbirlarda me’yorni saqlash va isrofgarchilikka yo‘l qo‘ymaslik.
O‘zbekiston Milliy teleradiokompaniyasi, O‘zbekiston Milliy axborot agentligi va boshqa ommaviy axborot vositalariga Ramazon oyini o‘tkazish bilan bog‘liq tadbirlarni keng yoritish tavsiya etilsin. Mazkur qarorning ijrosini nazorat qilish O‘zbekiston Respublikasining Bosh vaziri A.N.Aripov va O‘zbekiston Respublikasi Prezidentining maslahatchisi R.K.Davletov zimmasiga yuklansin.
O‘zbekiston Respublikasi Prezidenti Sh.Mirziyoyev