15 oktyabrdan 15 noyabrgacha "Tozalik va tartib" oyligi doirasida poytaxt hududida obodonlashtirish, sanitar tozalash va shaharning ekologik holatini yaxshilash bo‘yicha keng ko‘lamli ishlar amalga oshirildi. Ushbu tashabbus doirasida "Maxsustrans" DK Toshkentning turli hududlarini tozalash va obodonlashtirish bo‘yicha kompleks chora-tadbirlarni amalga oshirdi, bu esa poytaxtning sanitariya holatini sezilarli darajada yaxshilash imkonini berdi.

Hisobot davrida quyidagi natijalarga erishildi: Turar joy sektoridan 70 626 tonna qattiq maishiy chiqindilar olib chiqildi; Korxona va tashkilotlardan 23 543 tonna chiqindi olib chiqildi; Obodonlashtirish ishlariga korxonaning barcha 12 ta tuman filiallarining 10 222 ta maxsus texnikalari jalb etilgan; Sanitariya-tozalash ishlarida 25 758 nafar xodim ishtirok etdi. Bundan tashqari, 24 soatlik ish tartibi yo‘lga qo‘yilishi natijasida bir oy davomida 1 ming 550 ta maxsus texnika jalb qilinib, tungi smenada 15 ming tonnaga yaqin chiqindi olib chiqildi. Oylik doirasida Davlat ekologiya inspeksiyasi xodimlari tomonidan tabiatni muhofaza qilish qonunchiligiga rioya etilishi yuzasidan nazorat tadbirlari ham o‘tkazildi. Tekshiruvlar natijasida 448 ta huquqbuzarlik holati aniqlanib, belgilangan tartibda tegishli choralar ko‘rildi.