Unda kengash a’zolari, shahar boshqarma va tashkilotlari rahbarlari hamda tuman hokimlari ishtirok etdi. Yig‘ilish avvalida "Maxsustrans" DUK rahbari tizimda korrupsiyaga qarshi kurashish bo‘yicha ko‘rilayotgan chora-tadbirlar yuzasidan axborot berdi. Uning ta’kidlashicha, tashkilotda barcha maxsus texnikalarga videoregistratorlar o‘rnatilishi boshlangan, shuningdek, yoqilg‘i quyishda inson omili bosqichma-bosqich bartaraf etilmoqda.

Uy-joy kommunal xo‘jaligi boshqarmasi boshlig‘i o‘rinbosari shaffoflikni oshirish chora-tadbirlari va profilaktika ishlari natijalari haqida ma’lumot berdi. Tahlil qilinayotgan davrda 20 ta tekshiruv o‘tkazilib, 10 ta holatda korrupsiyaviy xavf-xatarlar yoki xizmat vazifalarini lozim darajada bajarmaslik bilan bog‘liq qoidabuzarliklar aniqlanib, tegishli choralar ko‘rilgan. Uchtepa, Shayxontohur va Sergeli tumanlari hokimlari hokimliklar faoliyatida ochiqlikni ta’minlash, korrupsiyaviy xavf-xatarlarni kamaytirish va jamoatchilik bilan hamkorlikni takomillashtirish bo‘yicha amalga oshirilgan amaliy ishlar yuzasidan hisobot berdi. Soliq, Sog‘liqni saqlash, Maktabgacha va maktab ta’limi boshqarmalari rahbarlari ham o‘z tuzilmalarida korrupsiyaga qarshi kurashish borasida amalga oshirilayotgan chora-tadbirlar to‘g‘risida ma’lumot berdi.

Yig‘ilish davomida dolzarb muammolar, ularning kelib chiqish omillari, profilaktika mexanizmlari, shuningdek, korrupsiyaga qarshi kurashish bo‘yicha shaffoflik va tizimli ishlarni yanada kuchaytirishga qaratilgan takliflar muhokama qilindi.