Toshkent viloyati Ohangaron tumanida joylashgan shahar chiqindixonasi 1971 yilda tashkil etilgan boʼlib, umumiy 59 gektar yer maydoni egallagan. Mazkur poligon 2023 yilning aprel-iyun oylarida to'liq rekultivatsiya qilinib, ustki qismi tuproq bilan toʼliq yopildi. Shu bilan birga, Ohangaron chiqindixonasi hududidagi bino-inshootlar taʼmirlanib, chiqindixonaga olib boruvchi yoʼllarning bir qismiga beton bardyurlar oʼrnatilib, yaroqsiz holga kelgan yoʼlning 3000 kv.m qismiga asfalt qoplamasi yotqizildi. 2022 yil 31 dekabr kuni Xitoyning “Stecol-Power China Guiyang” kompaniyasi va “Maxsustrans-Ishlab chiqarish boshqarmasi" Davlat korxonasi o‘rtasida SUE/Maxsustrans/ICB-W1(R) sonli shartnoma imzolandi va Ohangaron tumanida eski poligonga tutash hududda zamonaviy standartlar asosida yangi poligon qurilish ishlari boshlandi. 2024 yil sentyabr oyida qurilish ishlari yakunlangan va yangi poligon davlat komissiyasining topshirish - qabul qilish hulosasiga asosan ishga tushirilgan. Mazkur poligon maishiy chiqindilarni xavfsiz joylashtirish, atrof-muhit muhofazasini ta’minlash hamda hududning sanitariya holatini yaxshilashga xizmat qiladi. Poligonning umumiy maydoni 31,2 gektarni tashkil etib, shundan 24,4 gektar hududda uchta maxsus kotlovan qurildi. Loyiha doirasida 2,26 million m³ hajmda yer qazish ishlari amalga oshirildi. Poligonning umumiy sig‘imi 7,66 million m³ bo‘lib, u 12 yil davomida foydalanish imkoniyatiga ega. Ekologik xavfsizlikni ta’minlash maqsadida poligonda zamonaviy muhandislik yechimlari joriy etilgan. Xususan, turli xil kimyoviy va suyuq chiqindilarning yer osti suvlariga salbiy ta’sir ko‘rsatishining oldini olish uchun 4 qavatli bentonit hamda geosintetik materiallardan iborat maxsus himoya qatlami barpo etildi. Kelgusida poligonda hosil bo‘ladigan metan gazlarini zararsizlantirish va qayta ishlash maqsadida maxsus gaz quvurlari o‘rnatilgan bo‘lib, bu atrof-muhitga chiqadigan zararli chiqindilar miqdorini kamaytirishga xizmat qiladi. Shuningdek, obyekt hududida: — 0,7 gektar maydonda oqova suv yig‘ish ombori; — 0,76 gektar hududda ma’muriy-boshqaruv binosi; — 2,94 gektar maydonda ichki yo‘llar va boshqa infratuzilma inshootlari barpo etildi. Poligon hududiga 1,8 kilometr uzunlikda kirish yo‘li qurilgan bo‘lib, obyektda chiqindilar og‘irligini aniqlash uchun har biri 60 tonna sig‘imga ega bo‘lgan 2 ta elektron tarozi o‘rnatildi. Shu bilan birga, xavfsizlik va doimiy nazoratni ta’minlash maqsadida 8 ta 360 gradusli kuzatuv kameralari ishga tushirildi. Mazkur zamonaviy chiqindi poligoni aholiga ekologik jihatdan xavfsiz xizmat ko‘rsatish, chiqindilarni tizimli boshqarish hamda hududning sanitariya-ekologik barqarorligini ta’minlashda muhim ahamiyat kasb etadi.