Shuni e’tirof etish kerakki, shu paytgacha ko‘plab fuqarolar chiqindilarni olib chiqib ketish xizmati uchun olti oyda bir marta, hatto bir yilda bir marta haq to‘lab kelganlar. Bu vijdonli to‘lovchilarga tegishli. Biroq, ikki-uch yil davomida to‘lovni amalga oshirmaganlar ham bo‘ldi. Sababi oddiy edi: ma’lum bir iste’molchi uchun chiqindi tashish xizmatini to‘xtatib qo‘yishning iloji yo‘q edi. Endilikda ushbu muammo qonuniy yechimini topdi. Chiqindilarni to‘plash va olib chiqib ketish xizmatlarini ko‘rsatish sohasida to‘lov intizomini mustahkamlashga qaratilgan Qonunga muvofiq, agar ushbu xizmatlar uchun qarzdorlik xabarnoma yuborilgandan keyin 5 kun ichida to‘lanmasa, elektr energiyasi uchun to‘lovlarni qabul qilish qarzdorlik to‘liq qoplangunga qadar vaqtincha cheklanadi.

To‘lovni o‘z vaqtida amalga oshirmaslik natijasida fuqarolar iste’mol qilingan elektr energiyasi uchun to‘lovlarni amalga oshira olmaslik bilan bog‘liq jiddiy noqulayliklarga duch kelishlari mumkin. Bunday amaliyot dunyoning ko‘plab rivojlangan mamlakatlarida ham qo‘llaniladi, bu yerda kommunal to‘lovlarni o‘z vaqtida to‘lash fuqarolik mas’uliyatining ajralmas qismi hisoblanadi. Aslida, hech qanday ta’sir choralari qo‘llanilishini kutish kerak emas. Kommunal xizmatlar haqini o‘z vaqtida to‘lash madaniyatini shakllantirish — bu jamiyat oldidagi mas’uliyatni namoyon etish hamda shaharlarimizning tozaligi va sanitariya holatini ta’minlovchi korxonalarning barqaror ishlashi kafolatidir. Chiqindilarni olib chiqib ketish xizmatlari uchun muntazam va o‘z vaqtida haq to‘lash sanitar tozalash tizimining uzluksiz ishlashiga, ekologik vaziyatning yaxshilanishiga va barcha aholi uchun qulay muhit yaratilishiga xizmat qiladi.