Chiqindilarni boshqarish va sirkulyar iqtisodiyotni rivojlantirish agentligi ma’lum qilishicha, 11-dekabr holatiga ko‘ra, chiqindilarni olib chiqish xizmatlari uchun qarzdorligi to‘lanmagan 204 895 nafar abonentning elektr energiyasi uchun to‘lov imkoniyati vaqtincha cheklangan. Avvalroq respublika bo‘yicha 231 014 nafar abonentga "Hududiy elektr tarmoqlari" AJning "2100" qisqa raqamidan chiqindilarni olib chiqib ketish xizmatlari uchun jami 20,1 mlrd so‘m miqdorida debitor qarzdorlik yuzaga kelganligi to‘g‘risida SMS-xabar orqali xabar berilgan edi. Bildirishnomadan so‘ng abonentlarga qarzdorlikni to‘lash uchun 5 kunlik muddat berildi va shu vaqt ichida 9,4 mlrd so‘m to‘lab berildi. Hozirgi kunda respublika bo‘yicha chiqindilarni olib chiqib ketish xizmatlari bo‘yicha 18,2 mlrd so‘m miqdorida debitor qarzdorlik saqlanib qolmoqda.

Eslatib o‘tamiz, ko‘rsatilgan cheklov qarzdorlik to‘liq qoplanganidan so‘ng darhol olib tashlanadi. Ma’lumot uchun: 1044-sonli qonun bilan chiqindilarni to‘plash va olib chiqib ketish xizmatlari uchun to‘lov intizomi masalalari tartibga solindi. Unga ko‘ra, qarzdorlar to‘g‘risidagi ma’lumotlar har oyning 3-sanasiga qadar "Toza makon" agentligining elektron billing tizimidan "Hududiy elektr tarmoqlari" AJning billing tizimiga o‘tkaziladi. Ushbu tartib 2025-yil 30-iyunga qadar yuzaga kelgan qarzlarga nisbatan tatbiq etilmaydi. 2025-yil 1-iyuldan boshlab chiqindilarni olib chiqish xizmatlari uchun qarzdorlik hisobga olinadi va joriy yilning 5-noyabridan boshlab ushbu tartib qo‘llaniladi.

Avvalroq, 2026-yil 1-yanvardan boshlab chiqindilarni boshqarish xizmatlari uchun to‘lovlar faqat amalda ko‘rsatilgan xizmatlar uchun onlayn tarzda amalga oshirilishi xabar qilingandi. Hurmatli fuqarolar! Chiqindilarni boshqarish va sirkulyar iqtisodiyotni rivojlantirish agentligining "1205" qisqa raqamiga kecha-yu kunduz murojaat qilishingiz mumkin.