Davlatimiz rahbari tomonidan "Aholining ekologiya va turizm sohasidagi talablariga tezkor javob berish bo‘yicha boshqaruv tizimini yaratish chora-tadbirlari to‘g‘risida"gi Farmon imzolandi. Unga muvofiq:
O‘zbekiston Respublikasi Turizm qo‘mitasi Ekologiya, atrof-muhitni muhofaza qilish va iqlim o‘zgarishi vazirligi huzuridagi Turizm qo‘mitasini qayta tashkil etish yo‘li bilan tashkil etiladi. Ekologiya, atrof-muhitni muhofaza qilish va iqlim o‘zgarishi milliy qo‘mitasi Ekologiya, atrof-muhitni muhofaza qilish va iqlim o‘zgarishi vazirligi negizida, uni Vazirlar Mahkamasi tizimidan chiqarish orqali tashkil etiladi. O‘zbekiston Respublikasi Prezidentining ekologiya masalalari bo‘yicha maslahatchisi — Ekologiya va iqlim o‘zgarishi milliy qo‘mitasi raisi lavozimi joriy etiladi. Ekologiya qo‘mitasi Ekologiya, atrof-muhitni muhofaza qilish va iqlim o‘zgarishi vazirligining asosiy vazifalari bilan bir qatorda “Chiqindisiz hudud”, “Toza havo”, “Yashil makon”, “Ekologik madaniyat”, “Bionasliyat” umummilliy loyihalarini amalga oshirish uchun mas’ul etib belgilanadi. Qo‘mita huzurida 15 nafargacha xorijiy va mahalliy ekspertlarni jalb qilgan holda “Ekoloyihalar fabrikasi” tashkil etiladi. Ekologiya va iqlim o‘zgarishi milliy qo‘mitasining Davlat ekologik nazorat inspeksiyasi (Ekopolitsiya) tashkil etiladi.
Shuningdek, O‘zbekiston Respublikasi Prezidentining "O‘zbekiston Respublikasi Ekologiya va iqlim o‘zgarishi milliy qo‘mitasi faoliyatini tashkil etish chora-tadbirlari to‘g‘risida"gi qarori qabul qilindi. Hujjat bilan quyidagilar belgilandi: Ekologiya qo‘mitasining "Atrof-muhitni muhofaza qilish sohasida ixtisoslashtirilgan tahliliy nazorat markazi" davlat muassasasi negizida "Ekologik monitoring milliy markazi" davlat muassasasi tashkil etiladi;
2026-yil 1-sentyabrga qadar Yagona ekologik onlayn platforma faoliyati yo‘lga qo‘yiladi; atrof-muhitga ta’siri bo‘yicha I va II toifadagi sanoat korxonalari 2026-yil 1-martga qadar o‘z hududida fon monitoring stansiyalarini o‘rnatish va ularni Ekologiya qo‘mitasining Milliy ekologik monitoring markazi bilan integratsiya qilish choralarini ko‘rishi shart, aks holda 2026-yil 1-martdan boshlab ularga nisbatan kompensatsiya to‘lovlari 5 baravarga oshirilgan holda qo‘llaniladi; 2026-yil 1-martdan boshlab tabiatga yetkazilgan zarar uchun kompensatsiya to‘lovlaridan ozod qilish tarzidagi imtiyoz berish bilan bog‘liq barcha qonunchilik hujjatlari va huquqiy kuchga ega bo‘lgan ko‘rsatmalar o‘z kuchini yo‘qotgan hamda ushbu masala bo‘yicha imtiyoz berish faqat qonun orqali amalga oshiriladi;
- ekologiya va atrof-muhitni muhofaza qilish sohasidagi qonun hujjatlari talablariga rioya etilishini istisno qiluvchi yoki ularga rioya etmagan holda ruxsat etish xususiyatiga ega hujjatlarni berish, shu jumladan davlat ekologik ekspertizasi xulosasini berish, Hukumat qarorlari, farmoyishlari, bayonnomalari va yozma topshiriqlarini, idoralararo hujjatlarni, mahalliy ijro etuvchi hokimiyat organlarining daraxtlar va butalarni kesish va ko‘chirib o‘tkazishni nazarda tutuvchi hujjatlarini qabul qilish qat’iyan taqiqlanadi; Ekopolis xodimlariga jismoniy kuch ishlatish, maxsus vositalar (elektroshok qurilmalari) va xizmat quroli (rezina o‘qli, to‘rli) qo‘llash huquqi beriladi, shuningdek, ularning maxsus kiyimlariga bodikameralar o‘rnatiladi;
- 2026-yil 1-apreldan aholi punktlarining (shaharlar, posyolkalar va qishloq aholi punktlarining) o‘rmon fondiga kirmaydigan daraxtlar o‘sadigan yer maydonlarini olib qo‘yish yoki boshqa maqsadlarga ajratishni taqiqlash bo‘yicha jamoatchilik tashabbusi bilan chiqish imkoniyati yaratiladi.