O‘zbekistonda ekologik xavfsizlikni mustahkamlash, kimyoviy moddalar va chiqindilarni barqaror boshqarish tizimini rivojlantirish izchil davom etmoqda. Global ekologik jamg‘armaning (GEF) Samarqandda bo‘lib o‘tgan VIII Assambleyasi yakunlari bo‘yicha "O‘zbekistonda kimyoviy moddalar va chiqindilarni ekologik xavfsiz boshqarish orqali Stokgolm konvensiyasini amalga oshirishni qo‘llab-quvvatlash" yangi loyihasi ma’qullandi.

Loyiha O‘zbekiston Respublikasi Ekologiya va iqlim o‘zgarishi milliy qo‘mitasi tomonidan BMT Taraqqiyot dasturi (BMTTD) bilan birgalikda GEFning moliyaviy ko‘magida amalga oshiriladi. Tashabbusning umumiy byudjeti 4,95 million AQSH dollarini tashkil etadi. Loyihani amalga oshirish 2031-yilgacha mo‘ljallangan bo‘lib, kimyoviy moddalar va chiqindilarni ekologik xavfsiz boshqarish bo‘yicha milliy salohiyatni mustahkamlash, shuningdek, O‘zbekistonning Turg‘un organik ifloslantiruvchi moddalar to‘g‘risidagi Stokgolm konvensiyasi doirasidagi majburiyatlarini bajarishga qaratilgan. Bugungi kunda xavfli kimyoviy moddalar va chiqindilar bilan ishlash masalalari alohida dolzarblik kasb etmoqda. Mintaqaning ko‘plab mamlakatlari singari O‘zbekiston ham sanoat faoliyati va eskirgan pestitsidlarning to‘planishi bilan bog‘liq tarixiy atrof-muhit ifloslanishi oqibatlariga duch kelmoqda. Turg‘un organik ifloslantiruvchi moddalar ekotizimlar, bioxilma-xillik va aholi salomatligi uchun jiddiy xavf tug‘diradi, chunki ular atrof-muhitda uzoq vaqt davomida saqlanib qolishi va tirik organizmlarda to‘planishi mumkin.
 
Loyiha doirasida milliy monitoring tizimlari va laboratoriya bazasini modernizatsiya qilish, xavfli kimyoviy moddalar va chiqindilarni boshqarish mexanizmlarini takomillashtirish, ifloslangan hududlarni aniqlash va rekultivatsiya qilish, shuningdek, tegishli idoralarning texnik salohiyatini mustahkamlash va idoralararo hamkorlikni rivojlantirish ko‘zda tutilgan. Loyihaning bevosita benefitsiarlari 10 mingga yaqin aholi, jumladan, 5 ming nafar xotin-qizlar bo‘lishi kutilmoqda. Asosiy ekologik natijalar orasida barqaror organik ifloslantiruvchi moddalar bilan ifloslangan 565 tonna qattiq va suyuq chiqindilarni ekologik jihatdan xavfsiz olib tashlash va utilizatsiya qilish, shuningdek, 150 tonna eskirgan pestitsidlarni xavfsiz yo‘q qilish mavjud.
 
Loyihaning amalga oshirilishi ekologik xavflarni kamaytirish, aholi salomatligini muhofaza qilish va tabiiy ekotizimlarni saqlab qolishda muhim qadam bo‘ladi. Tashabbus, shuningdek, atrof-muhitni muhofaza qilish sohasidagi milliy maqsadlarga erishish va O‘zbekistonning yanada yashil va barqaror kelajakka o‘tishiga salmoqli hissa qo‘shadi.

Hurmatli fuqarolar!

"Maxsustrans ishlab chiqarish boshqarmasi" Davlat korxonasi 23 iyun kuni soat 16:00 da Yunusobod tumani Usta Shirin mahallasida sayyor qabul o‘tkazilishini ma’lum qiladi.

Qabul davomida chiqindilarni boshqarish va sanitariya xizmatlarini takomillashtirish bilan bog‘liq taklif va savollar bilan murojaat qilishingiz mumkin.
Sizning taklif va murojaatlaringiz biz uchun muhim!

Beshinchi Toshkent xalqaro investitsiya forumi doirasida "Nol chiqindi" tamoyili asosida "yashil iqtisodiyot" o‘sishiga ko‘maklashish maqsadida mamlakatlar o‘rtasidagi hamkorlik masalalari bo‘yicha turli uchrashuvlar tashkil etildi.

Xususan, Chiqindilarni boshqarish va sirkulyar iqtisodiyotni rivojlantirish agentligi vakillari yirik xalqaro tashkilotlar va kompaniyalar rahbarlari ishtirokida bir qator uchrashuvlar o‘tkazdi, ularda Markaziy Osiyo mamlakatlari va xorijiy davlatlarning chiqindilarni boshqarish sohasidagi qo‘shma chora-tadbirlarining ahamiyati ta’kidlandi.

O‘tkazilgan uchrashuvlar yakunida Chiqindilarni boshqarish va sirkulyar iqtisodiyotni rivojlantirish agentligi direktori Sharifbek Hasanov, Saudiya Arabistonining "VISION INTERNATIONAL INVESTMENT COMPANY" kompaniyasi prezidenti Omar Almidani va Fransiyaning "SUEZ INTERNATIONAL" kompaniyasining Yevropa va Markaziy Osiyo bo‘yicha bosh direktori Silver Delone niyatlar to‘g‘risidagi bitimni (Head of Terms) imzoladilar.

Ushbu loyiha xavfli chiqindilarni qayta ishlash sohasida hamkorlikni nazarda tutadi. Loyihaning umumiy qiymati 78 million AQSH dollarini tashkil etadi.

Ta’kidlash joizki, dunyoning 100 dan ortiq davlatidan 10 mingdan ortiq delegat va ishtirokchilarni birlashtirgan forum tadbirning xalqaro nufuzi ortib borayotgani, shuningdek, xalqaro hamjamiyatning mamlakatimizda amalga oshirilayotgan islohotlarga ishonchi mustahkamlanayotganini ko‘rsatuvchi muhim maydonga aylandi.

Korrupsiya jamiyat taraqqiyotiga to'sqinlik qiladigan, adolat va qonun ustuvorligiga putur yetkazadigan salbiy illatdir. Uni bartaraf etish faqat davlat organlarining emas, balki har bir fuqaroning ham muhim vazifasidir.

Har bir xodim o‘z faoliyatida halollik, shaffoflik va qonuniylik tamoyillariga qat’iy amal qilishi lozim. Xizmat vazifasini bajarish jarayonida har qanday noqonuniy manfaat, pora olish yoki berish, manfaatlar to‘qnashuviga yo‘l qo‘yish qonunchilikka zid hisoblanadi.

Korrupsiyaga duch keldingizmi? Beparvo bo'lmang! Korrupsiya holatlari haqida xabar berish orqali halol va shaffof tizimni shakllantirishga o'z hissangizni qo'shing. Korrupsiyaga oid murojaat va xabarlar uchun rasmda ko'rsatilgan ishonch telefonlari orqali bog'lanishingiz yoki korrupsiyaga qarshi kurashish bo'yicha mas'ul xodim Baxtiyor Fayziyevga murojaat qilishingiz mumkin. Shuningdek, QR-kodlarni skanerlab, korxonamizning rasmiy ijtimoiy tarmoq sahifalarini kuzatib boring.

Sizning murojaatingiz muhim. Halollik va shaffoflik yo‘lida birgalikda harakat qilaylik!

Bugun Respublika sog‘lomlashtirish markazi mutaxassislari Z. Mamanov va G.Tursunboyev ishtirokida O‘zbekiston Respublikasi Prezidentining aholi o‘rtasida sog‘lom turmush tarzini keng targ‘ib qilishga qaratilgan siyosatiga bag‘ishlangan yig‘ilish bo‘lib o‘tdi.
Tadbir davomida xodimlarning o‘z vaqtida tibbiy ko‘rikdan o‘tishi, salomatligini mustahkamlash, kasalliklarning oldini olish hamda sog‘lom turmush madaniyatini shakllantirish masalalari muhokama qilindi.

Ishtirokchilarga salomatlikni saqlash va mustahkamlash uchun to‘g‘ri va muvozanatli ovqatlanish, muntazam jismoniy faollik, zararli odatlardan voz kechish va sog‘lom turmush tarzi tamoyillariga rioya qilishning ahamiyati haqida batafsil ma’lumot berildi.
Uchrashuv yakunida sog‘lom va faol turmush tarzini ommalashtirish har bir insonning o‘z salomatligi va farovonligi uchun mas’uliyatini oshirishga xizmat qilishi ta’kidlandi.

Toshkent shahrida atrof-muhitni muhofaza qilish, energiya samaradorligini oshirish va zamonaviy infratuzilmani rivojlantirish ishlari izchil davom ettirilmoqda.

Bugungi kunda poytaxtimizdagi 206 ta chiqindi to‘plash shoxobchasiga quyosh panellari o‘rnatildi. Ushbu loyiha qayta tiklanuvchi energiya manbalaridan oqilona foydalanish, elektr energiyasi iste’molini kamaytirish va ekologik barqarorlikni ta’minlashga xizmat qiladi.

Bundan tashqari, quyosh panellari tufayli chiqindi to‘plash punktlarida o‘rnatilgan videokuzatuv kameralarining uzluksiz ishlashi ta’minlanadi, bu esa chiqindilar bilan bog‘liq qoidalarga rioya etilishini nazorat qilishni kuchaytiradi. Bu hududlarning sanitariya holatini yaxshilash, shuningdek, shahar aholisi uchun yanada qulay va xavfsiz muhit yaratishda muhim omil hisoblanadi.

O‘zbekiston Respublikasi Prezidentining tinchlik, barqarorlik va millatlararo totuvlikni mustahkamlashga qaratilgan siyosati doirasida terrorizm, ekstremizm va turli buzg‘unchi g‘oyalarga qarshi kurashish masalalariga alohida e’tibor qaratilmoqda.

Shu munosabat bilan boshqarma majlislar zalida terrorizm va ekstremizmning oldini olish, fuqarolarni turli zararli oqimlar ta’siridan himoya qilish hamda yoshlar o‘rtasida mafkuraviy immunitetni mustahkamlashga bag‘ishlangan profilaktik uchrashuv bo‘lib o‘tdi.

Tadbirda "Hazrati Umar" jome masjidi imomi va shahar hokimligi vakili ishtirok etdi. Ular yig‘ilganlarga terrorizm va diniy ekstremizmning jamiyat taraqqiyotiga salbiy ta’siri, shuningdek, noqonuniy va taqiqlangan diniy-ekstremistik tashkilotlar, ularning internet resurslari va kanallariga nisbatan ehtiyot bo‘lish zarurligi haqida batafsil so‘zlab berdilar.

Suhbat davomida Internet tarmog‘ida turli buzg‘unchi g‘oyalar, soxta diniy da’vatlar, shuningdek, taqiqlangan sayt va kanallarni tarqatish va ko‘rishning huquqiy va ma’naviy-axloqiy oqibatlari tushuntirildi. Bundan tashqari, ishtirokchilarga aholini, ayniqsa, yoshlarni axborot tahdidlaridan himoya qilish, milliy va ma’naviy qadriyatlarga sodiqlikni mustahkamlash bo‘yicha tavsiyalar berildi.

Oyliklar olindi, nafaqalar to'landi, kreditlar yopildi, muzlatkich to'ldirildi....Lekin chiqindilarni olib chiqish uchun majburiy to‘lovlarni to‘ladingizmi?? Agar yo‘q bo‘lsa, zudlik bilan shug‘ullaning. Hamyoningizdan ozgina mablag‘ butun tizimning barqaror va uzilishlarsiz ishlashiga yordam beradi.

Qurilish va boshqa turdagi chiqindilarni belgilanmagan joylarga tashlagan fuqarolarga ekologiya inspektorlari tomonidan ma’muriy jarimalar yoziladi. Eslatib o‘tamiz, chiqindilar faqat maxsus ajratilgan joylarda, maxsus texnika yordamida olib chiqilishi va utilizatsiya qilinishi shart.

От имени коллектива "Maxsustrans" jamoasi butun dunyo bolalarini Xalqaro bolalarni himoya qilish kuni bilan samimiy muborakbod etadi!

Har bir bola tinch va musaffo osmon ostida ulg‘ayishini, g‘amxo‘rlik, sevgi va baxtni his etishini, bolaligi esa quvonch, tabassum va yorqin orzularga to‘la bo‘lishini tilaymiz.