Yuridik shaxslar uchun ommaviy oferta shartnomasi namunasi

O‘zbekiston Respublikasi Prezidentining “Chiqindilarni boshqarish tizimini takomillashtirish va ularning ekologik vaziyatga salbiy ta’sirini kamaytirish bo‘yicha chora-tadbirlar to‘g‘risida” 2024-yil 4-yanvardagi 5-sonli Farmoniga ko‘ra, joriy yilning          1-iyulidan boshlab alohida ko‘chmas mulkdan foydalanadigan yuridik shaxslar hamda yakka tartibdagi tadbirkorlar uchun qattiq maishiy chiqindilarni to‘plash va olib chiqib ketish bo‘yicha ko‘rsatiladigan xizmatlar ommaviy oferta asosida amalga oshiriladi. 

Farmonda: 

• Bunda oferta faqatgina faoliyati davomida alohida ko‘chmas mulkdan foydalanadigan yuridik shaxslar yoki yakka tartibdagi tadbirkorlar bilan mazkur ko‘chmas mulk joylashgan hududga biriktirilgan sanitar tozalash korxonasi o‘rtasida tuziladi;
• Qoraqalpog‘iston Respublikasi Jo‘qorg‘i Kengesi, viloyatlar va Toshkent shahar xalq deputatlari Kengashlari yuridik shaxslar va yakka tartibdagi tadbirkorlar uchun ularning faoliyat turlari va xususiyatlaridan kelib chiqib, chiqindi to‘plash me’yorlarini tasdiqlaydi hamda ommaviy ofertadagi to‘lov summalari ushbu me’yorlarga asoslangan holda belgilanadi, - deyilgan.

Bu orqali tadbirkorlik obyektidan mazkur hududga biriktirilgan sanitar tozalash korxonasi chiqindilarni olib ketadi va tadbirkor esa buning uchun belgilangan to‘lovni avtomatik tarzda amalga oshirishi kerak bo‘ladi. Bu o‘z o‘rnida ikki tomon uchun ham maqbul yechim hisoblanadi.